Ставот #Благодарам како животна вештина

Мал, свесен избор што се вежба

Jan 20, 2026

Овој текст настана од едно едноставно прашање кое често ми го поставуваат родителите:
„Како сето ова што го споделуваш да го направиме дел од секојдневието?“

Затоа што благодарноста не е идеја што се разбира еднаш, таа е вештина што се вежба. И токму како секоја животна вештина, бара:

структура
свесност
и #ЛиченИЗБОР

Затоа и е една од носечките вредности во Кампањата #ЛиченИЗБОР.

Благодарноста не е само чувство, таа е и став.

Често ја поврзуваме благодарноста со убави моменти, подароци, љубезно/културно однесување или „кога сè е во ред“. Но во пракса, благодарноста е начин на размислување, таа е избор:

каде го насочуваме вниманието,
што забележуваме
и како реагираме.

Во свет каде што сите брзаат, бараат и очекуваат, благодарноста е мал, свесен #ЛиченИЗБОР што прави голема разлика и кај децата и кај нас, големите. Не треба да заборавиме дека покрај сите работи кои ги обезбедуваме за нашите деца – топол дом, облека, храна, играчки, одмор ... на дар им го даваме и нашиот став кон животот.

Од идеја до пракса: како се вежба благодарноста?

Благодарноста не се учи со објаснување, се учи преку доживување/искуство.

Со текот на времето, во работа со родители и деца, се кристализираа неколку едноставни, но моќни пристапи:

Преку мали РУТУАЛИ

Ритуалите ѝ даваат форма на благодарноста, тие ја прават видлива и повторлива.

Тоа може да биде:

запишување на нешто за кое сме благодарни, книгата #Благодарам има одлична структура за таа цел, на крајот останува и како споменар во семејството
споделување на благодарност на крајот од денот, мислата/енергијата со која си легнуваме е мислата/енергијата со која стануваме
изработете честитка или напишете писмо за да искажете благодарност, детали во книгата #Благодарам или на следниот линк
направете си ваша тегличка за благодарност, детали во книгата #Благодарам или на следниот линк
изработете семеен постор на благодарност, детали во книгата #Благодарам или на следниот линк

Затоа што ритуалот создава навика но и дава сигурност.

Преку ИГРА

Како што вели Жан Пијаже: „Играта е работата на детето.“

И токму затоа играта е едно од најмоќните помагала за учење бидејќи бара целосна вклученост, присутност и искуство. Низ игра, децата (а често и ние, возрасните) учиме, размислуваме и развиваме вештини, додека истовремено се забавуваме.

Понесена од таа логика ги создадов играта, картичките и предизвикот #Благодарам (за деца и големи). Негувањето на ставот #Благодарам преку игра има и други бенефити:

децата учат без притисок,
се отвора простор за смеа и разговор,
вештината се врзува со позитивно искуство.

Материјалите може бесплатно да се симнат од мојата веб-страница и да се користат дома, во училница или на..., на начин што најмногу ви одговара.

Благодарноста како рамка, не како список

Често и јас самата сакам „план“, но план во форма на список брзо станува уште една обврска. Затоа благодарноста има потреба од рамка, не од листа:

рамка што нè потсетува,
рамка што нè враќа,
рамка што нè води.

Прашањето со кое сакам да го заокружам овој текст доаѓа од книгата 50+ идеи #Благодарам: Што ако благодарноста е олимписка дисциплина?

Олимпијадата е симбол за извонредност, врвна вештина, посветеност и вежба.

А сепак гледаме луѓе што се извонредни во една друга дисциплина – кукање.

Што значи, начинот за извонредност е познат. Само е направен поинаков избор. А изборот секогаш може да се промени, ние не сме посадени дрвја, можеме да направиме и поинаков #ЛиченИЗБОР.

Благодарноста не е проект што се завршува, таа е животна вештина што се живее.

И токму тука се среќава со суштината на Кампањата #ЛиченИЗБОР, изборот како свесна, секојдневна одлука за тоа каков став негуваме и какви вештини градиме кај децата и кај себе. Доколку ова резонира со тебе во #КЛУБзаРодители активно работиме на развој на животни вештини (благодарноста е секако една од нив) кај децата кои ќе им бидат потребни во светот на големите.

Прашање за крај (и почеток)

Кој е твојот #ЛиченИЗБОР на мал ритуал што ќе го поканиш да ти прави друштво во негувањето на ставот #Благодарам? За тебе? Во твоето семејство?

Пиши ми се радувам да ги чујам твоите избори. 💛